KAHIT saan magpunta ngayon si Wally Bayola ay talagang pinagkakaguluhan siya ng mga dabarkads – siyempre, dahil ‘yan sa pagganap niya sa kalyeserye ng Eat Bulaga bilang si Lola Nidora.
Biglang sikat uli ang TV host-comedian dahil sa pagpapatawa at pagdadrama niya sa kalyeserye na pinagbibidahan din nina Alden Richards at Maine Mendoza alyas Yaya Dub. Sabi nga ng mga nakakausap namin, buradung-burado na ngayon sa isipan ng mga tao ang kinasangkutan niyang iskandalo noon.
Nakachikahan namin si Wally at ng ilang piling miyembro ng entertainment press kamakailan sa Zirkoh Morato at dito nga naiparating sa kanya na kung merong isang lalaking artista na karapat-dapat bigyan ng Best Actor award, siya na yun.
Bukod kasi sa role niya bilang si Lola Nidora, may dalawa pa siyang papel sa kalyeserye ng AlDub – sina Duhrizz at Rihanna. “Siyempre po, nakaka-overwhelm.
Pero sabi ko nga, yung simpleng marami kang napapatawa…kumbaga kasi, marami ang nagsasabi sa amin, lalo na nung isang beses na nagpunta ako sa St.
Luke’s (Hospital), ang sabi sa akin, ‘Meron kang tagahanga na ganito, puwede ka raw bang pumunta du’n?’
“Pinuntahan ko ang nanay. Sabi sa akin, ‘Salamat po. Naaawa kami sa nanay namin.’ Pero kapag nanonood siya ng AlDub, nag-i-smile raw ang nanay nila.
“Yun ang malaking reward sa amin. Nakakapagpasaya kami ng taong malungkot, may sakit,” kuwento ni Wally. Hindi pa rin makapaniwala si Wally na tanggap na tanggap na uli siya ng publiko, at nagpapasalamat siya kay Lola Nidora dahil dito talaga siya mas tumatak sa isip at puso ng mga manonood, “Sa tagal ko na rin na maraming ginagaya, talagang ito lang si Lola Nidora ang nabigyan ng moment.”
At kung dati ay kontrabidang-kontrabida ang dating ni Lola Nidora sa pag-iibigan nina Alden at Yaya Dub, hindi na ngayon. Kahit nga ang mga bata ay natutuwa na rin sa kanya dahil sa mga inspiring words of wisdom ni Lola Nidora.
“Nagulat lang ako dahil nagkataon na yung lola, hindi na masyadong galit. Hindi na masyadong galit sa dalawa (Alden at Yaya Dub). Parang pumapayag na siya. Marami na ang nagmamahal kay Lola sa AlDub Nation,” chika ng komedyante.
Kahit nga raw ang mga anak niya ay apektado sa karakter niya sa kalyeserye, “Actually, noong una, noong parang kinokontra ko si Alden, galit! Lalo na yung maliit. Sabi niya, ‘Papa, bakit naman mad ka kay Alden?’ Sabi ko, ‘Hindi, script lang yun, anak.’ Tapos noong pumapayag na ako, sabi sa akin ng bunso ko, ‘Very good na si Papa.’”
In fairness, maligaya ang lahat ng dabarkads para kay Wally dahil masasabing bumalik na ang tiwala sa kanya ng mga tao, “Masaya ako, lalo na sa mga mentors ko, yung mga unang-unang sabi ko na hindi ko sasayangin yung chance na ibinigay nila.
“Unang-una na ang mga boss ko sa Eat Bulaga, mga mentors ko, sina Mamu (Andrew de Real), yung mga nagtuturo sa akin dati. Sa school ko siyempre, sa pinagtapusan kong school, sa Naga. Sa mga taga-Naga, mga kababayan ko sa Naga, mga Bicolano.
At least, sabi ko, naibawi ko yung chance na ibinigay.” Dagdag pa ni Wally, “Yung trabaho namin sa Eat Bulaga, yung hirap, sabi nga nila, ‘Grabe yung ginagawa mo, ang init-init.’ Tapos, costume-costume sa init ng araw.
Sabi ko naman, salamat at maganda ang rehistro ng paghihirap namin, maganda ang resulta bilang nagpapasalamat kami nang sobra.”
Ngayong tanghali naman inaasahang muling magkikita sina Alden at Yaya Dub sa studio ng Eat Bulaga. Kahapon pa lang, todo na ang ginagawang paghahanda ng mga dabarkads sa studio para sa pagdalaw nina Lola Nidora, Lola Tinidora (Jose Manalo) at Lola Tidora (Paolo Ballesteros) kasama si Yaya Dub.
Pumayag si Lola Nidora na magpunta sa studio para mabigyan uli ng chance na magkasama kahit sandali lang sina Alden at Yaya. Pero inulit ni Lola Nidora ang kanyang mga kundisyon – paiiralin pa rin ang kanyang “no touch” at “one foot” rule.
Humiling naman si Alden kay Lola Nidora kung pwede siyang bumeso kay Yaya, pero hindi ito pumayag, dapat daw makuntento ang binata kung ano lang ang meron sila ngayon ni Maine. Nag-request naman si Lola ng maraming tubig sa studio para hindi na mabilaukan si Yaya tulad ng nangyari last week.
Ito ang dahilan kung bakit nagkahawak ng kamay ang AlDub at nasuway ang “no touch” rule.
Promise naman ni Tito Sotto, “Basta kami na ang bahala kay Alden, kayo ang bahala kay Yaya.”
Bago matapos ang kalyeserye, may hiniling si Lola Nidora kina Tito, Vic & Joey – kung pwede raw ay haranahin siya ng TVJ ngayong tanghali na pinagbigyan naman ng tatlong host-comedian. Kaya tutukan ngayong araw ang TVJ meets AlDub with the Lolas sa Eat Bulaga.
