Wish ng Barangay Ginebra fans: Kuning muse si Yaya Dub sa 41st season ng PBA!

WALA na talagang makakapigil sa kasikatan nina Alden Richards at Yaya Dub o Maine Mendoza sa tunay na buhay. 

Biglang naging instant superstar ang dalawa sa Eat Bulaga, lalo na nang simulan ng nila ang kanilang kalyeserye na talagang tinututukan nga- yon ng buong mundo.

Kamakailan ay pumirma ng movie contract si Alden sa APT Entertainment, sumunod dito ang pagpirma niya ng kontrata sa GMA Records bilang singer at balita namin ay makakasama na rin sila ni Yaya Dub sa MMFF entry nina Vic Sotto at Ai Ai delas Alas na “Rom-Comin Mo Ako”.

Ang latest, si Yaya Dub din daw ang request ng Barangay Ginebra fans na kuning muse ng nasabing basketball team sa opening ng 41st season ng PBA sa October.

Sa isang sports website namin nabasa na maraming fans ng Ginebra ang humihiling kay Yaya Dub, tiyak daw na mas iingay ang Barangay Ginebra kapag ang tinaguriang Dubsmash Queen ang kinuha nilang muse.

Ayon sa ulat, open naman daw si PBA chairman Robin Non, ang tumatayo ring basketball operations head ng SMC franchise, sa hiling ng Ginebra fans.

Pero aniya, hindi naman daw siya o ang players ng Ginebra ang makakapagdesisyon tungkol dito.
Sey nito, kailangang dumaan muna ito sa SMC marketing department, ang namamahala sa pagpili ng magiging muse ng lahat ng team under SMC.

Sa ngayon, mas malaki ang posibilidad na si Ellen Adarna ang maging muse ng Ginebra dahil siya ang 2015 calendar girl ng nasabing produkto.

Samantala, nag-tweet naman ang isang executive ng Ginebra ng, “Mga ka barangay susubukan natin ibigay ang idea sa marketing para makuha natin si YAYA DUB para muse ng ginebra — alfrancis chua.”