MARAMING natuwang fans at netizens nang mabalitaan nilang okay na uli ang mag-inang Sharon Cuneta at KC Concepcion.
Kumalat kasi sa social media ang litrato kung saan makikitang dinalaw ni KC at Miel ang kanilang ina na naka-confine pa rin sa St. Luke’s Hospital dahil sa pagkakaroon ng matinding ubo.
Wala mang detalyeng ipinost si Sharon o si KC sa nasabing Facebook photo, ipinalalagay ng kani-kanilang mga kaibigan at supporters na nagkakayos na nga ang dalawa matapos magkaroon ng hindi pagkakaunawaan ilang buwan na ang nakararaan.
Mismong si Megastar pa nga ang nag-post ng picture nilang mag-ina. Makikita rito na nakahiga pa rin sa kanyang hospital bed ang TV host-actress ngunit bakas sa mukha nito ang kaligayahan.
Ayon sa mga naunang FB post ni Mega, posibleng nakuha niya ang hindi gumaling-galing na ubo noong magbakasyon silang mag-anak sa ibang bansa.
Kung matatandaan, mismong si Sharon din ang nagbalita sa madlang pipol na meron silang pinagdaraanang mag-ina na kalaunan ay kinumpirma rin ni KC. Pero sey ng dalagang aktres, hindi na siya magbibigay ng detalye kung ano ang pinag-ugatan ng tampuhan nilang mag-ina dahil malaki pa rin ang respeto niya rito at ayaw niya itong malagay sa alanganin.
Ayon kay Sharon, isa lang sa naging rason ng gap nila ng anak ay dahil sa pagpapaseksi nito sa kanyang pictorial at iba pang projects. Sey pa nga ni Mega, “Sorry pero nanay ako… may mga bagay na ‘di naman na kailangan gawin. Madaming beses na din kasi akong nagulat.”
