Mga nakakalokang video nina Alden at Yaya Dub kalat na sa iba’t ibang bansa

Kabaligtaran naman ng ugali ng bida sa blind item natin ang Kapuso Teleserye Prince na si Alden Richards na puro papuri ang natatanggap mula sa kanyang supporters at ng kanyang mga nakakatrabaho sa GMA 7.
In fairness, mabait talaga ang binata sa lahat ng nakakasalamuha niya, noong nagsisimula pa lang siya sa showbiz ay talagang marespeto na siya, lalung-lalo na sa kanyang fans na walang sawang sumusuporta sa kanya.
Magalang at marespeto rin sin siya sa mga miyembro ng entertainment media, lalo na sa pagsagot sa mga sensitibong issue. Kaya hindi na kami nagtataka kung bakit hanggang ngayon ay patuloy siyang inuulan ng blessings.
Sabi nga ng isang nakausap namin na nagulat sa kabaitan ni Alden, “Lahat talaga binabati niya, laging naka-smile. Hindi mo siya makikitang naiirita kahit na ang dami-daming nagpapa-picture sa kanya. At talagang siya pa ang aakbay sa fans, kaya tingnan mo, until now, very visible pa rin siya.”
At napatunayan namin na talagang sikat na sikat na ngayon ang binata dahil isa siya sa nakatanggap ng pinakamalakas na tinilian at palakpakan sa ginanap na “Thank You Kapuso Grand Fans Day” noong Linggo sa MOA Arena.
Talagang dumagundong ang MOA Arena nang mag-perform na si Alden (as in hataw kung hataw ang binata sa kantang Twerk It Like Miley) kasama ang iba pang Kapuso stars, tulad nina Iya Villania, Kris Bernal, Louise delos Reyes, Mark Herras, Enzo Pineda, Rochelle Pangilinan at marami pang iba.
Sayang nga lang at hindi kasama ni Alden sa Kapuso Fans Day ang bagong itinatambal sa kanya na si Yaya Dub (Maine Mendoza) sa noontime show ng GMA na Eat Bulaga. In fairness, sikat na sikat na ngayon ang loveteam nilang “AlDub” hindi lang sa Pilipinas kundi pati na rin sa iba’t ibang bansa.
Sa katunayan, ang AlDub tandem ang sinasabing pinakamalaking factor kung bakit patuloy na nagiging number one sa ratings game ang Eat Bulaga. Lagi nitong tinatalo ang katapat na programa sa ABS-CBN na It’s Showtime.
Palagi ring nagte-trending ang AlDub loveteam sa social media, bukod pa riyan ang pagkalat ng kanilang video collection na kuha sa mga episodes ng Eat Bulaga.
Kaya hindi na kami magtataka kung isang araw ay magkaroon na rin ng sariling show sina Alden at Yaya Dub dahil nga sa biglang pagsikat ng kanilang loveteam. Sa pagkakaalam namin, marami nang natatanggap na request ang GMA at ang Tape Inc., ng Eat Bulaga na bigyan na ng teleserye ang AlDub habang mainit na mainit pa sila sa televiewers.