Parang nakikita na namin ang eksena ngayon sa production room ng It’s Showtime. Ang ibang staff ay gigil na gigil dahil pinakakain sila ng alikabok ng Eat Bulaga.
Ang iba nama’y handang makipaglaban, handang-handa silang makipasalpukan, kaya todo-todo ang pag-iisip nila ngayon ng mga bagong atakeng tatapat sa pinagpipistahang kalyeseryeng pinagbibidahan ng AlDub.
Sobrang sikat ngayon ang loveteam, ultimo mga paslit na bata ay kinikilig sa loveteam nina Yaya Dub at Alden Richards, siyempre’y aliw na aliw rin sila kina Wally Bayola bilang si Lola Nidora at Jose Manalo na gumaganap namang si Frankie Arenolli.
Ibang klase ang kasikatan ng AlDub. Parang biyaya mula sa langit ‘yun na nasalo nina Alden Richards at Yaya Dub para pakinabangan nang husto ng Eat Bulaga.
Araw-araw nilang kinakain ngayon ang rating ng kalaban nilang programa, napakataas ng kanilang numero, habang sadsad na sadsad naman ang kanilang katunggali.
Sabi ng isang source, “Paano naman hindi pakakainin ng alikabok ng Eat Bulaga ang Showtime, e, bukod sa nagsasawa na ang mga kababayan natin sa mga paulit-ulit na antics ni Vice Ganda, e, napakagulo pa ng sitwasyon sa loob?
“Di ba, may kinasuhan silang staff dahil sa nawawalang budget ng show? Kung du’n mismo sa loob, e, magulo na sila, paano pa gaganda ang rating ng show nila?
“Ayusin muna dapat nila ang mga problema nila sa loob, kailangang maayos ang climate sa linya ng trabaho nila, para gumanda ang takbo ng show,” opinyon ng aming impormante.
Walang kuwestiyon, panahon ng AlDub ngayon, sa ayaw at sa gusto ng kanilang kalaban sa ere.
No comments:
Post a Comment