MAGKAKAPALIT ng buhay sina Alden Richards at Maine Mendoza alyas Yaya Dub sa pagpapatuloy ng phenomenal Kalyeserye ng Eat Bulaga simula sa lunes.
Sa pagtatapos kasi ng episode ng Eat Bulaga kanina, hiniling ni Lola Nidora (Wally Bayola) kung pwede niyang iwan muna si Yaya Dub sa pangangalaga ni Bossing Vic Sotto at isasama naman niya si Alden sa mansiyon para ito ang magbantay at mag-alaga sa kanya.
Si Alden na rin ang makakasama nina Lola Nidora, Lola Tinidora (Jose Manalo) at Lola Tidora (Paolo Ballesteros) sa pagsugod sa mga barangay para sa segment na “Juan For All, All For Juan”.
Pumayag naman si Bossing na magpalit muna ng trabaho sina Alden at Yaya Dub, ngunit bago pa matapos ang episode ng kalyeserye kahapon, may tumawag na naman kay Lola Nidora para ibalitang may nangyari sa mansyon kaya kailangan na niyang umalis kasama si Alden.
Tulad ng inaasahan nag-number one trending topic na naman ang noontime show ng GMA 7 kahapon kung saan dumalaw nga ang The Explorer Family kasama si Yaya Dub sa studio ng Eat Bulaga. Habang isinusulat namin ang balitang ito, nakakuha na ng mahigit 10.1 million tweets ang hashtag #ALDUBmeetsTVJ.
Unang dumating sa studio si Tinidora at humataw agad sa stage. Ilang sandali pa ay dumating na rin sina Lola Nidora at Yaya. Isa-isang ipinakilala sa kanya ang mga Dabarkads. Pero bago sila magkita uli ni Alden, hinarana nina Tito, Vic, & Joey si Lola Nidora tulad ng kanilang pangako.
Mas baging riot ang eksena nang biglang kumanta si Jimmy Santos para haranihin din si Lola. Dito na naglulupasay si Lola Nidora dahil sa sobrang kilig.
Napuno naman ng tilian ang buong studio pati na rin ang paligid sa labas ng Broadway (kung saan naroon ang napakaraming dabarkads na hindi na nakapasok sa loob) nang muling magkaharap sina Alden at Maine.
Binigyan ng binata si Yaya pati na rin sina Lola Nidora at Tinidora ng bulaklak na mula pa sa Cebu kung saan nagkaroon ng mall show ang Kapuso heartthrob.
Pero bago pa nakaupo ang AlDub sa hinandang lamesa ng Dabarkads sa studio at makpag-usap muli ay binigyan muli ng challenge ni Lola si Alden – kailangang talunin ng binata si Lola sa bato-bato pik.
Sa ending, nagwagi muli si Alden kaya jackpot na naman ito kay Yaya. At dito na nga nangyari ang makasaysayang “first shake hands” ng dalawa.
At dahil ayaw iwan ni Lola Nidora ang AlDub dahil baka may gawin na naman ang mga ito na labag sa kanyang mga kautusan, niyaya siya ni Allan K na lapitan muna ang studio audience para mabati niya ito at makapagpa-selfie.
Sinamantala naman nina Alden at Yaya Dub ang pagkakataon – nilapit nila ang isa’t isa at uminom pa sa iisang shell ng buko sa pamamagitan ng straw. Nag-selfie pa ang dalawa at nagpa-picture kasama ang mga Dabarkads.
Naghiwayan pa ang audience nang inilagay ni Joey ang kamay ni Alden sa balikat ni Yaya Dub. Mas pinakilig pa nila ang manonood nang mag-duet sila nang live (Wish I May) gamit ang kanilang mga tunay na boses.
May isa pa raw dahilan si Lola Nidora kaya sila pumunta sa studio, sinabi niya sa TVJ na gusto niyang maging bahagi ng Bayanihan Ni Juan project ng Dabarkads. Pero bago nga matapos ang nasabing episode ng kalyeserye, biglang tumawag si Rihanna, ang mayordoma ni Lola Nidora – may nangyari raw sa mansyon.
Mabilis na umalis ang lola kasama si Alden na binitbit pa ng mga Rogelio palabas ng studio, habang naiwan na si Yaya sa piling ng mga dabarkads.
Ano nga kaya ang nangyari sa mansyon, may naganap bang masama o baka naman may good news lang si Rihanna para sa kanyang amo? Ano naman kaya ang ipagagawa kay Yaya sa studio bilang bagong co-host ng noontime show?
At magampanan kaya ni Alden ang mga bagong challenges na ibibigay sa kanya ni Lola Nidora ngayong siya naman ang makakasama sa pagsugod sa mga barangay? Yan ang kailangang abangan ng buong bayan sa pagpapatuloy ng Kalyeserye ngayong Lunes.
No comments:
Post a Comment